Анатоль Арцёмавіч Брытун нарадзіўся ў вёсцы Баранцы Жабінкаўскага раёна Брэсцкай вобласці.

Навучаўся ў Пінскім гідрамеліярацыйным тэхнікуме, Горацкай сельскагаспадарчай акадэміі, Брэсцкім дзяржаўным педагагічным інстытуце імя А.С. Пушкіна. Працаваў у Брэсцкай дырэкцыі Галоўпалессевадбуд, гідам-перакладчыкам у турыстычнай фірме «Спутник», старэйшым інспектарам Брэсцкай мытні.

Актыўна займацца літаратурнай дзейнасцю Анатоль Брытун пачаў у 2007 годзе. У 2013 годзе Анатоль Арцёмавіч прыняты ў Саюз пісьменнікаў Беларусі. Аўтар кніг прозы «Пах мускусу», «Сяліба», «Трылогія прыгод тысячагоддзя».

У 2014 годзе за «Пах мускусу» Анатоль Брытун стаў лаўрэатам літаратурнай прэміі імя У. Каласніка Брэсцкага аблвыканкама ў намінацыі «Проза». На пачатку 2023 года Анатоль Арцёмавіч стаў пераможцам абласнога літаратурнага конкурсу «Духоўная веліч» у намінацыі «Літаратура для дзяцей і юнацтва» за кнігу «Трылогія прыгод тысячагоддзя».